好似好耐冇出過聖人post，喺呢一段抗疫期間教友雖然冇得親身去望彌撒，但都希望可以透過我哋提供嘅少少資訊，喺靈性同埋知識上面有所得益。而你睇過我哋今日所介紹嘅聖人之後，不妨都將呢一個小知識share畀一個朋友，等佢今日都學一樣新嘢。
言歸正傳，今日要介紹嘅聖人，佢嘅節日喺歐美國家會被瘋狂慶祝，但好可惜慶祝嘅重點已經再唔係放喺聖人自己身上，呢位係愛爾蘭嘅主保聖人聖博德St Patrick。
聖人小故仔 故仔1：其實聖人自己本身並唔係愛爾蘭人，佢係英格蘭人。喺佢16歲時候被人擄走咗去愛爾蘭做奴隸，負責看羊。聖人喺呢一段時間相當難過，喺自傳度咁樣講過，佢話聖神感動咗佢，佢每日白天祈禱超過100次，晚上祈禱超過100次。有一晚，喺睡夢間有人同佢講船已經準備好，叫佢返去英格蘭。就係咁，聖人終於可以返番去佢自己屋企。而相隔若干年後，聖人已經成為主教，並且要再次踏足愛爾蘭呢個地方。 故仔2： 聖人再次踏上愛爾蘭，今次佢要將成個愛爾蘭嘅異教徒皈依天主教會，當佢講到天主聖三嘅奧秘時，隨手見到地下有棵三葉草，週用咗呢棵三葉草去解釋天主聖三比呢一班異教徒聽，而三葉草之後亦都成為愛爾蘭嘅代表之一。 第二件事相傳聖人做過嘅就係將愛爾蘭島上面嘅蛇全部趕走，不過小編就見到好多人話當時愛爾蘭島上面其實係冇蛇嘅。第三樣關於聖人嘅事蹟就係相傳聖人寫落一篇禱文叫做St Patrick’s Breastplate，呢一篇禱文講述聖人對天主萬事嘅祈求，亦都記錄咗喺愛爾蘭嘅國寶Book of Armagh裏面。不過小編又見到好多人話其實篇禱文並唔係聖人寫㗎喎，不過唔緊要，呢篇禱文係小編嘅我的最愛之一，放條link睇到畀各位聽下，有埋字幕，幾好！https://youtu.be/gRHjyJCZFnM 同場加映：https://youtu.be/rs-EKnJMFls 今次同場加映想畀機會大家傳畀多啲人一齊學多啲嘢，所以特登喺youtube搵咗一個關於聖人一生嘅故事書，特意畀各位父母可以喺呢段時間同仔女一齊過一啲quality time，一齊學一啲聖人嘅生平事蹟。雖然呢本故事書係英文嘅，但係有真人發聲，亦都有標示讀到去邊度。父母同仔女一齊睇，既溫馨，又學到英文，真係美好。 今次小小哋介紹住咁多先，下次有機會再同大家講下愛爾蘭呢個天主教國家。 · #catholic #churchsupplies #christusrex #christthekingsupplies #hongkongcatholic #macaucatholic #liturgy #stpatrick #stpatricksday #bishop #ireland #clover #shamrock #stpatricksbreastplate
Comments