【中華殉道聖人－聖張大鵬】

當諗起聖人嘅時候，好多時都會諗起一啲聖經記載到嘅聖人，或者外國好多不同嘅聖人，但大家對於中華殉道聖人又了解幾多？今日係其中一位聖人－聖張大鵬嘅紀念日，佢就喺1815年嘅今日喺貴州殉道，今日就同大家介紹吓聖人嘅生平。 ・

聖人1754年喺貴州出世，原本同一位商人合夥經營絲業，而呢位合夥人嘅兒子王正個陣上京赴考，係京城認識天主並領洗入教，王正返到貴陽，見張大鵬忠誠正直，就同佢傳教，但佢家人當時極力反對。 ・ 聖人最後喺1800年領洗，奉聖若瑟為主保，而聖人之後嘅經歷一啲都唔簡單。聖人兩個細佬因為擔心聖人奉教係干犯朝廷禁令，有失體面，所以曾經逼聖人背教，咁聖人當然無動搖啦！之後佢兩個細佬仲屈聖人及其他教友係反清復明嘅白蓮教徒，令當時唔少教友被捕。 ・ 雖然聖人當時借機逃離，但好快又返去繼續傳教，喺1802年先初領聖體。之後又經歷過出走避難，當時其他教友包括聖人嘅仔都被捕，之後仲充軍到新疆、內蒙，貴陽嘅聖堂都被拆毀。當時風聲好緊，聖人逃到去重慶，當時徐德新主教（巴黎外方傳教會士、其中一位中華殉道聖人）叫聖人返貴陽領導及鼓勵教友，聖人辦告解及領聖體後，便一心準備回貴陽殉道。 ・ 雖然當時聖人嘅情況好危險，但亦不忘繼續傳教，最後喺1814年被捕，當時官員多次俾機會聖人如肯背教就可免一死，但聖人意志堅定，直至去到刑場，聖人曾經咁話：「天主憐憫我，真是仁慈至極，我更願受斬刑，但是，隨天主安排吧。」，即使當時家人努力勸聖人背教，但聖人最後咁話：「不要哭，我死是為天主，又不曾犯法；我一死，就升天享福了。」之後就被絞刑處死。 ・ 信耶穌從來唔係易事，亦唔係理所當然嘅事，聖張大鵬嘅芳表俾我哋知道喺人生中，全力追隨耶穌先係最重要。今日特別請求聖人為我哋有堅毅嘅信德而祈禱，讓我哋無論遇到咩事，都可以全心依賴天主！ ・ 聖張大鵬，為我等祈！ ・ #聖張大鵬 #StZhangDaPeng #catholic #churchsupplies #christusrex #christtheking #christthekingsupplies #hongkongcatholic #macaucatholic #天主教 #一站式天主教網購平台