今日係聖灰星期三，即係四旬期嘅開始，今年因應肺炎嘅情況，香港教區暫停晒所有公開彌撒，所以今年嘅聖灰瞻禮都唔可以親身去聖堂參與彌撒同領聖灰，但係守齋同祈禱係唔會因為疫情而暫停，而且係更加需要添！
今日領唔到聖灰，就同大家講少少關於聖灰嘅事，原來係早期教會嘅時候，教友如果犯左大罪，係需要做為期四十日嘅公開補贖，係呢段時間要禁食、著住羊皮苦衣、唔可以領聖體、頭上被撒灰等，當時直至聖週四先可以參與修和，重新領返聖體。之後慢慢演變到而家無左舊時公開嘅補贖，所有教友都一齊係聖灰星期三領聖灰。
「人啊！你要記住，你原來是塵土，將來還要歸於塵土。（參閱創 3:19）」領聖灰提醒我地人生好短暫，現世生命有一天都會完結，所以要及早悔改。最近因為疫症同政府施政嘅影響，我地都生活係驚恐之中，驚無口罩、驚唔夠廁紙、驚會中肺炎等等。今年係武漢肺炎下嘅四旬期，都可能可以比我地更體驗到生命嘅無常，亦可以比我地重新檢視同天主嘅關係。 香港教區禮委因應疫情嘅情況，準備左一份係呢段防疫期間適用嘅聖灰星期三禮文，雖然公開彌撒暫停，但禮委都鼓勵我地用呢份禮文(http://catholic-dlc.org.hk/mt20200226.pdf)自行反省、祈禱、懺悔。另外都提醒我地係今年聖灰星期三同四旬期內嘅星期五應該個別拜苦路(http://catholic-dlc.org.hk/p2c200716.htm)。 我地係四旬期需要守齋、祈禱、履行愛德工作，係今年嘅四旬期入面，我地更需要特別為醫護祈禱、留意下身邊有無人唔夠口罩、關心因疫情而情緒受影響嘅朋友。讓我地好好準備自己，去迎接主基督苦難及復活嘅奧蹟！ #catholic #churchsupplies #christusrex #christthekingsupplies #hongkongcatholic #liturgy #ashwednesday #lent
Comments